ՀՀ դեսպան Վարուժան Ներսեսյանը հանդիպումը ամերիկյան հայտնի քաղաքական գործիչ, նախկին սենատոր, Հայաստանի և հայ ժողովրդի մեծ բարեկամ Բոբ Դոուլի հետ

17 դեկտեմբերի, 2019

Ս․թ․ դեկտեմբերի 17-ին, ՀՀ դեսպան Վարուժան Ներսեսյանը հանդիպեց ամերիկյան հայտնի քաղաքական գործիչ, նախկին սենատոր, Հայաստանի և հայ ժողովրդի մեծ բարեկամ Բոբ Դոուլին:
Հայասատանի Հանրապետության նախագահի ու վարչապետի անունից ողջունելով սենատորին` դեսպան Ներսեսյանը նրան հանձնեց «Պատվո» շքանշանը, որը շնորհվել էր հայ-ամերիկյան բարեկամական հարաբերությունների զարգացմանը Բոբ Դոուլի ներդրած անգնահատելի ավանդի համար:
Դեսպան Ներսեսյանը նաև հատուկ շնորհակալություն հայտնեց սենատոր Դոուլին` դեռևս 1980-90ական թվականներին Հայոց Ցեղասպանության ճանաչմանն ուղղված իր ջանքների համար, որի հեռահար արդյունքը վերջերս ԱՄՆ Ներկայացուցիչների պալատի ու Սենատի կողմից ընդունված բանաձևերն են: Սենատոր Դոուլն, իր հերթին, ընդգծեց, որ շատ գոհ է, որ այդ երկարամյա պայքարը նման հաղթանակով պսակվեց: Հիշելով իր մեծ ընկեր, բժիշկ Համբար Քելիքյանին, ով Երկրորդ աշխարհամարտի ժամանակ փրկել էր իր կյանքը, նա նշեց, որ միշտ հպարտացել է հայերի և Հայաստանի հետ իր բարեկամությամբ:
Դեսպան Ներսեսյանը պատմեց թավշյա հեղափոխությունից հետո Հայաստանում տեղի ունեցող լայնածավալ ժողովրդավարական բարեփոխումների ու հայ-ամերիկյան հարաբերություններում արձանագրված դրական փոփոխությունների մասին: Նա նաև տեղեկացրեց սենատորին իր հարազատ Կանզաս նահանգի, մասնավորապես` Կանզասի Ազգային գվարդիայի և ՀՀ Զինված ուժերի միջև ծավալվող համագործակցության մասին: Բոբ Դոուլը պատրաստակամությունը հայտնեց իր աջակցությունը բերելու այս գործընթացներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր